အက်ဒရီယန်၊ ပရီးမီးယားလိဂ်ကို အလွတ်ပြောင်းရွှေ့ကြေးနဲ့ ရောက်ရှိလာသူတစ်ဦး၊ သူဟာ လီဗာပူးလ်ရဲ့ သမိုင်းတွင်မယ့် ကာလတစ်ခုမှာ အသင်းသား တစ်ဦးအဖြစ် ရှင်သန်ခွင့်ရခဲ့တယ်။ လီဗာပူးလ်ကို ရောက်ရှိပြီးနောက် ဖြစ်ရပ်တိုင်းဟာ အက်ဒရီယန်အတွက် ပျော်ရွှင်ဖွယ်ရာတွေပါပဲ။ ဒုတိယလူတစ်ဦး ဆိုပေမယ့် လီဗာပူးလ်အတွက် တိုက်ပွဲဝင်ခွင့်ရမယ့် အချိန်တိုင်း ကိုယ့်ကိုယ်ကိုယ် အကောင်းဆုံးဖြစ်အောင် အသင့်ပြင်ထားသူ၊ လီဗာပူးလ်ရောက်ပြီးမှ အက်ဒရီယန်ရင်ထဲ အကြည်ဓာတ်ဟာ ပိုပြီးစိမ်းလန်းစိုပြေလာတယ်။
အယ်လစ်ဆန်ဟာ ကမ္ဘာ့အကောင်းဆုံး ဂိုးသမားတစ်ဦးဆိုတာ အက်ဒရီယန် မငြင်းဆိုဘူး။ ဒါပေမဲ့ ဒီလိုနဲ့ပဲ ကိုယ့်ယုံကြည်မှုကိုယ် စတေးလိုက်ရမှာလား။ ကိုယ့်ကိုယ်ကိုယ် အကောင်းဆုံး ရုန်းကန်စေပြီး ပွဲထွက်ခွင့်ရချိန်မှာ အသင့်ဖြစ်နေအောင် အက်ဒရီယန် ပြင်ဆင်ထားတယ်။ မဲလ်ဝုဒ်လေ့ကျင့်ရေးကွင်းမှာ အယ်လစ်ဆန်နဲ့အတူ လေ့ကျင့်ခန်းဆင်းချိန်တိုင်း အက်ဒရီယန် ဂုဏ်ယူပျော်ရွှင်ရသလို၊ အခြားတစ်ဖက်မှာလည်း ပြိုင်ဘက်ကောင်းတစ်ဦး ဖြစ်လာအောင် ကိုယ့်ကိုယ်ကိုယ် အက်ဒရီယန် ပုံသွင်းယူထားတယ်။
