ရန်ကုန်မြို့က ရေဝေးသုသာန်မှာ သြဂုတ် ၄ ရက်က အသက် (၁၄) အရွယ် အလယ်တန်းကျောင်းသူတစ်ဦးရဲ့ နာရေးပြုလုပ်ခဲ့ပြီး သြဂုတ် ၆ ရက်က အသက် (၇) နှစ်အရွယ် မူလတန်းကျောင်းသူလေးတစ်ဦးရဲ့ နာရေး ပြုလုပ်ခဲ့ပါတယ်။ သြဂုတ် ၂ ရက်မနက်ခင်းမှာ သူတို့ကျောင်းသူနှစ်ဦးဟာ ကျောင်းသွားတဲ့ရက်တွေရဲ့ ထုံးစံအတိုင်း ကျောင်းသွားဖို့ ပြင်ဆင်ရင်း ဆိုင်ကယ်ကယ်ရီနဲ့ ကျောင်းကို သွားခဲ့ကြတယ်။ မိုးအုံ့ဆိုင်းနေတဲ့မနက်ခင်းမှာဖြစ်ခဲ့တဲ့ မင်္ဂလာဒုံမြို့နယ် ရန်ကုန်-ပြည်လမ်းက ယာဉ်တိုက်မှုဖြစ်စဉ်ဟာ သူတို့လေးတွေကို စာသင်ခန်းတွေရဲ့ အဝေး ထာဝရ ခွဲခွာသွားစေခဲ့တယ်။