■ ဟာလန်းရဲ့ လျှပ်စစ်စီးသလို သွင်းဂိုးတွေ ဘောလုံးကမ္ဘာကို သိမ်းပိုက်ချိန်
ဟာလန်းရဲ့ သွင်းဂိုးတွေ အစွမ်းကုန်ဖူးပွင့်နေချိန်အထိ သံသယမျက်ဝန်းတွေရှိနေဆဲပဲ။ အသက် (၁၉)နှစ်အရွယ် ချာတိတ်လေးဟာ အနာဂတ်မှာ စီရော်နယ်လ်ဒိုနဲ့ မက်ဆီရဲ့ အရိပ်ကို ထိုးဖောက်မယ့်သူအဖြစ် ယုံကြည်သူခပ်များများမရှိခဲ့ဘူး။ ဒါကလည်း သိပ်ပြီးဆန်းကြယ်တဲ့အရာမျိုးမဟုတ်ဘူး။ စီရော်နယ်လ်ဒိုနဲ့ မက်ဆီဟာ ဘောလုံးကမ္ဘာကို သူမတူအောင် လွှမ်းမိုးနိုင်သူတွေမဟုတ်လား။
သူတို့နှစ်ဦးအပေါ် ကပ်ငြိနေမယ့် ဘောလုံးပရိသတ်သန်းပေါင်းများစွာရဲ့ အစွဲဟာ ချွတ်ရခက်နေဆဲမဟုတ်လား။ ဒါပေမဲ့ သူတို့နှစ်ဦးအလွန် ဘောလုံးကမ္ဘာရဲ့ ပြိုင်ဆိုင်မှုလမ်းကို မျှော်တွေးကြည့်ရင် ဟာလန်းဟာ နောက်ကျကျန်ရစ်နေမယ့် ကြယ်တစ်ပွင့်မဟုတ်ဘူး။ သူဟာအနာဂတ်ဘောလုံးကမ္ဘာရဲ့ လင်းလက်ကြယ်ဖြစ်မယ့်အကြောင်း ဘုရားသခင်နိမိတ်ဖတ်ထားသလို ဟာလန်းယုံကြည်နေလေရဲ့။
